ЗА потивко Дебар Маало и Градски Парк - ЗА дислоцирање на Summerland

Стари дебармаалци знаат многу добро како изгледаше Дебар Маало до пред 30 години. Сликата беше мирно маало со три-четири кафани и две кафулиња низ целот маало. Мир и тишина имаше во воздухот. Летно време кога бев дете, од луѓе по улицата имаше маалски баби кои си муабетеа и дедовци кои играа шах. Летно време се слушаа звуци од штурци и имаше светулки кои доаѓаа од Градски Парк. Ние игравме жмурки на ѕидчето од Општина Центар и трчавме преку калдрмата бидејќи беше празно, по некој човек ваму таму и слободни паркинг места да паркираш авион. Од кафани постоеше само Идадија, Наџак Чамо и Хермо и имаше една трафика за весници на ќошот кај што стојат сега таксистите. Ван Гог тогаш беше ноќен клуб и отвораше после полноќ откако сите бевме легнати. Искрено не памтам како го решавале моментот со музиката тогаш, али знам дека немавме никаква мака. Пред некои 20 години почна полека се' да се менува. Нормално, постепено. Една кафана, друга кафана, кафиќ врз кафиќ и врз него ако може уште два, жива музика (прво беше акустична- Тули и жена му), а после тоа некој, на кој домата му е на друго место, реши да донесе и појачала. Општината нови сектори отвори, луѓе еден тон се појавија да се чудиш како ги собира, а цела администрација на Град Скопје во парк. Малку по малку неприметно не' угушија. Дебармаалци и жителите околу Градскиот Парк се бунеа, кој за бучава, кој за узурпиран простор на тротоар, на кого му врзале велосипед за портата од дворот, кој не може да си ја извади колата од паркинг затоа што тој што го блокирал „се враќа за пет минути“...на крај се откажаа бидејќи кога надлежни што треба да ги слушнат и да сторат нешто ги нема никаде. Значи остануваат две опции, од кои едната е нелегална- да си ќутиш или да се тепаш со кафанџии, узурпатори, луѓе без осет. Се навикнавме и на месец јуни дека почнуваат дискотеките во парк и од пред некоја година почнавме да се навикнуваме на неколкуте настани на Вембли и Школка по завршеток на школската година.

Од оваа година во парк почна Summerland. Тоа е фестивал на Школка и ќе биде секој ден од 4-ти до 28-ми јули со почеток од 18ч00-00ч30 и со саат време претходно штимање. Грото од луѓето кои што живеат тука работат помеѓу 08 и 17 часот. Значи, цел јули месец од работа директно на журка додека да си легнеме. Ај ние сме можеби и помал проблем. Што е со бебињата, што е со старите и изнемоштени лица, што е со луѓето што сакаат да си прошетаат во мирна природа? Дебармаалци и жителите во парк немаат право на одмор и тишина затоа што некој така одлучил. Со целокупната претходна ситуација, бевме навикнати кои денови е Ван Гог погласен, кои денови Калдрма, кои денови Ганза, кои денови има настан во парк...и некако подгризнуваш затоа што знаеш дека утре ќе заврши. Ама сега со Summerland осудени сме да бидеме жртви на звучно загадување секој ден од 17ч00-00ч30. Ова е многу сериозно што треба дебармаалци да го поднесуваат секојдневно. Бараме да се врати бар малку од малку мирот во Дебар Маало и Summerland да биде дислоцирн. Моето семејство и јас сериозно размислуваме да си заминеме од местото кое нашите предци го граделе со љубов за да ни го остават. Како и многу дебармаалци што веќе си заминаа.

Го напишав овој поширок текст затоа што има луѓе кои знаат да кажат дека Дебар Маало е такво и треба да биде само со кафани. Дебар Маало е такво откако некој без размислување реши да го смени.
За крај сакам да споделам една моја случка. Лани бев во зоолошката во Антверп, една од најстарите зоолошки во светот со потекло од 1843. Во една од турите, вработената која што се грижеше за окапите ми кажа дека секој петок кафулето преку улица од зоолошката има џез свирка и трубата и' пречела на окапата. Заради тоа, вработените од зоолошката поднеле барање до кафулето свирката да се премести во друго кафуле, подалеку од зоолошката. Се воодушевив од нивото на свесност кое го имаат за животните. Додека нашите главни, најбучни настани се на само 50 метри од нив, меѓу населено место.

Сакаме во Европска Унија? Убаво ни вика Балашевиќ, Путуј Европо...
   
                 
                            Дебармаалка