Drejtuar: Kryeministrit të Shqipërisë z. Edi Rama: Tërhiq propozimin për dënimin me burg të shpifjes, dekriminalizo shqipfjen

Një grup organizatash të medias, gazetarësh, aktivistësh të të drejtave të njeriut dhe qytetarësh, duke marrë parasysh se:

a) Liria e shprehjes është sakaq shumë e dobët në Shqipëri për qytetarët dhe gazetarët;

b) Duke pasur parasysh klimën mbizotëruese të ndëshkimit ekstraligjor ekzistues ndaj fjalës së lirë;

c) Duke pasur parasysh nivelin sakaq alarmant të vetëcenzurës nga frika e pasojave ekstraligjore të shkaktuara nga mungesa e sundimit të ligjit mes qytetarëve dhe gazetarëve;

d) Duke pasur parasysh praktikat më të mira ndërkombëtare

dhe,

a) të alarmuar nga propozimi i qeverisë për instalimin në kodin penal të nenit 238/a të Kodit Penal për dënimin e shpifjes ndaj zyrtarëve publik me deri tre vjet burg;

b) të alarmuar nga rreziku i lartë për abuzim të zyrtarëve përmes këtij ligji në dëm të lirisë së shprehjes;

c) të alarmuar nga mënyra thellësisht jodemokratike se si qeveria aktuale e sheh të drejtën e lirisë së shprehjes;

gjykojmë se:

a) propozimi bie ndesh me rekomandimet aktuale ndërkombëtare që bëjnë thirrje për dekriminalizim të plotë të shpifjes dhe jo për ashpërsim të dënimit të saj;

b) gjykojmë se fryma e propozimit sugjeron dëshirën e qeverisë për të kërcënuar kritikët dhe jo për të luftuar fenomenin e shpifjes;

c) gjykojmë se një legjislacion i tillë i hap rrugën përndjekjes së gazetarëve dhe qytetarëve;

d) gjykojmë se situata aktuale e sistemit të drejtësisë është larg të qenit garantues të gjykimit të drejtë të rasteve komplekse si akuza penale për shpifje;

e) gjykojmë se Shqipëria vuan nga mungesa e lirisë dhe jo nga tepria e lirisë;

për këto arsye kërkojmë;

a) tërheqjen e menjëhershme të qeverisë nga projektligji i propozuar;

b) shfuqizimin sa më parë të nenit 120 të Kodit Penal dhe transferimin e shpifjes vetëm te legjislacioni civil.


Shoqatat dhe qytetarët nismëtarë
Shoqata e Gazetarëve Profesionistë të Shqipërisë

Unioni i Gazetarëve të Shqipërisë

Lidhja e Gazetarëve të Shqipërisë

Rrjeti Ballkanik i Gazetarisë Investigative Shqipëri (BIRN Albania)

Shoqata të tjera dhe individë