إلى رئاسة النيابة العامة: كرامة بناتنا رهينة بصرامة قضائنا

نحن مواطنون مغاربة، لا حظنا في هذه الآونة الأخيرة انتشار جريمة ورا جريمة ... الاغتصاب و التحرش و محاولة الاغتصاب لي ولاو كايهددو بنات بلادنا كل يوم ....

علاش يوصلو أنهم يديرو السماعات ف ودنيهم باش ما يسمعوش البسالة ديال رباعة ديال المكبوتين؟

علاش تولي البنت خدامة و كاتزرب باش ما تخرجش ف الظلمة حيت تخاف يتلقى ليها شي واحد؟

علاش الطوبيس و الدرب و الخدمة ولاو غابة تخاف فيها على المرأة من بطش ذئاب ف صفة بشر؟

علاش أشباه المسؤولين ولاو كايفرضو أكل لحوم بنات بلادنا مقابل انصافهم ف الخدمة ديالهم؟

الجريمة ملي كاتوقع و كاتعود توقع كاتولي ظاهرة اجتماعية سلبية، و الظواهر السلبية وحده القضاء من يمتلك صلاحية الزجر و الردع لوضع نهاية لها.

داك شي علاش، نناشدكم باش تعطيو تعليماتكم، كل حسب تخصصه و مجال تدخله، باش القضاء يحكم على هاد النوع من المجرمين بأقصى العقوبات المنصوص عليها قانونا، دون أن يدخل في اعتبارات و ضغوطات بعض المحسوبين على الجمعيات الحقوقية.

الا الناس عرفو حدة العقوبة لي خداها المتحرش أو من حاول الاغتصاب، أكيد غادي يكون عبرة و تا واحد ما غادي يفكر يدير بحالو. أما الا متعناه بظروف التخفيف أخدا بعين الاعتبار "وضعيته أو حالته الاجتماعية" فإن تلك الذئاب البشرية غادا تلقى فيها سبة باش تخبا وراها و دير ما بغات.

نطلب منكم تشديد العقوبة على كل من سولت له نفسه أنه يتعدى على بنات الناس.

بناتنا و بناتكم، خواتاتنا و خواتاتكم، أمهاتنا و امهاتكم، زوجاتنا و زوجاتكم ... غذا يقدر يكون الدور عليهم إلا هاد الوحوش البشرية ما تردعوش و خداو العبرة.